Jodlerreise 2003


Slowenienreise 2003

Der Versuch eines Reiseberichtes

E schöni Reis isch scho verbi,

und es isch ganz e tolli gsi.


De Car bequem und d'Luune guet,

so starte mir mit frohem Muet.


Uf der Autobahn Hunger lyde,

das tuet eus fascht i Wahnsinn trybe.


In Slowenie stygt der Walter us,

fahrt im-ne rote Auto vorus.


S'Gaspedal abe, uf und dervo!

Fascht wäre mir im Falsche no!


Mir sind denn doch is Hotel cho,

wo mir is händ verwöhne loh.


Zum Znacht uf em Täller e ganze Fisch,

es grosses Gstürm am Zmorgetisch!


Was hämmer denn nid alles gseh:

Museum, Schloss und no viel meh.


Wy-Buur, Rösser, frömdi Wält,

alles das für fascht kei Gäld.


Singe mit em-ne andere Chor,

es chunnt dir wie im Himmel vor.


Lange Tag und churzi Nacht.

S'Pfüsi wird im Car inn gmacht.


Händ guet gässe und gnue trunke

De Lüt am Strosserand mol gwunke 

(oder: d'Fürz im Car hei ömel gstunke!)


Andri Mensche hämmer troffe,

sind e Huffe umegloffe.


Dur ne Grotte simmer gange,

de Grotteolm hämmer nid gfange!


Sind mänge Schritt dur d'Höhli gloffe,

händ Stalaktitt.... und .....mitte troffe.


Di Höhli isch ydrücklich gsy.

Doch alles goht so schnäll verby.


Ein hett das alles organisiert,

hett planet, gschriebe, telefoniert.


Isch umegreist, hett disponiert,

Plän gmacht und wieder revidiert.


Hett Uskunft gäh uf alli Froge,

hett gwüsst, ob me die Reis cha woge.


Dir wüsset scho, wär i do meine:

Es gitt im Chörli gloub nur eine


wo so begabt isch, zum das mache.

Aer macht bi eus no andri Sache!


Walti, mir wänd dir härzlich danke

für dini Arbet, für gueti Gedanke.


Im Name vom Vorstand und vo eus alle

säg i: Merci, es hett eus mega guet gfalle!


Als Reiseleiter bisch du toll!

Mir freue eus scho uf's nächste Mol!!


Du hesch vo eus es Gschänkli zguet.

Mir hoffe, dass's dir gfalle tuet.


Ruth Meier